﮼حَسن،الرياحِي .

الانسان مستحيل يسامح الشخص ، اللي زرع في داخله شكوك في كل حاجة مألوفة ، وخلاه واخذ حذره من لا شيء .

اسوء شي يمر بيه اي شخص هو ان ياخذ موقف من اشخاص كانو يعزو عليه حتى الحديث معاهم يقعد معاناة وفي حكم المجاملة ، تقعد النية معدومة ، والقابلية فيهم منتهية ومش مرغوبة ، لكن ح تدرك بعدها ان الاشخص كانو غلط ، والوقت كان غلط ، وانك نخدعت في وقت كنت فيه متلخبط ومش لاقي نفسك .

استثمار النفوس ومحاولة استيعابها على حساب نفسك ، مفهوم غلط ، عمره مايصنع منك شخص محبوب ، القبول من ربك عمره ماكان بالتنازل ولا بالتصنع ولا حتى بالمظاهر ، فيه فرق يا ناس بين الشخص المرن عشان يوصل لنتيجة ، وبين الشخص الضعيف العايش ع الاراء ، كلمة تجيبه , وعشرة توديه .

الطبيعي إن لكل فعل رد فعل ، لكن مش كل فعل يستاهل رد فعل ، في حاجات مفروض ولازم تتفوت لأن الرد عليها يعطيها قيمة في الأساس ما تملكهش ويخليها قادرة تأثر عليك ، ومافيش شي يقدر يأثر عليك إلا لو عطيته الفرصة .

موت مسلوخ ولا تذل روحك عشان حد ، تعلم تحط نفسك فوقهم كلهم مهما جبراتك الظروف وبطنك كلت لحمها ماتخليش حد يحط عليك جميل ، سيورها الدنيا تروق ويلي قاعد فيها يروق وتزهالك .

اللي قاعد يوصلك إن قادر ياخذ من حد ثاني شي أفضل من اللي أنت تقدم فيه ومع هذا ياخد منك ومش موقف ، ولا اللي يبينلك إنه قادر يكون في مكان أفضل من اللي عطيته له ومع هذا مكمل وممشاش ، الفئة هذي اللي ياكلوا في الغلة ويسبو في الملة احرمهم من الغلة وخلي يشوفوا حياتهم بعيد عليك ، أنت الاكيد ماتبيش حد قاعد يقلل من اللي اديرله فيه ، ولا تبي تصرف جهد على الفاضي .

حتقعد غبي لو نقصت من قيمة شيء واكبر غباء لو عطيته اكثر من حجمه وتلقى روحك متشنج في حياتك بسبب انك تعطي في اعتبار لكل شي وأي شيء، قدّس نفسك وذاتك واحترمها وعطيها فوق ما تستحق وفوق من حجمها لانها الوحيده يلي مش حتشوف روحها عليك في يوم من الايام عكس الناس الاخره يلي لما يشوفوك قايمها بيهم حيشوفوا روحهم عليك .

في واجد فاهمين موضوع توسيع العلاقات غلط ، العلاقات العامة هي اللي لازم توسعها على قد ما تقدر ، وبطريقة صح وتبادل منفعة مهني وإنساني بس بيناتكم ، والعكس بالضبط مع العلاقات الشخصية .

الوعي ما يضمنلكش النجاة طول ، لكن يخليك تعرف عليش أنت غارق أو شن درت بالضبط بيش غرقت ، تفهم وفهم الحاجات اللي توجعك مش كويس لكن ضروري ، وضروري أكثر إنك ما تضايقش لما حتى وأنت عندك الوعي قاعد تتعب ، الفايدة من الوعي مش في إن يخليك ما تتعبش ، الفايدة في إنك تعرف امتى لازم تتعب .

في قصص ما فيهش فوز ولا خسارة ، فيها إنك تفيق وتفهم إنك كنت تدفع في ثمن حاجات مش لك من الأساس .